En l'Engiadina e la Val Müstair surdattan pliras vischnancas da nov las incumbensas da polizia a la Polizia chantunala dal Grischun. Ils represchentants da S-chanf, Val Müstair e Zernez han suttascrit la mesemna a Zernez ils contracts correspundents cun il chantun. Las radunanzas communalas da las trais vischnancas han approvà quest atun da far quest pass. Il medem mument ha Samignun renovà ses contract cun la Polizia chantunala. Quai resorta d'ina communicaziun dal departament da giustia.
En tut 18 vischnancas
Sper las quatter vischnancas che han suttascrit u renovà la mesemna la cunvegna cun la Polizia chantunala, han las suandantas 14 vischnancas grischunas gia realisà quella midada:
- Bever – Bregaglia – Poschiavo – Puntraschigna (anc fin la fin dal 2019) – Samedan – Schlarigna – Scuol – Segl – Tavau – Trimmis – Tusaun – Vaz Sut – Zizers – Zuoz
Per il chantun sajan quels contracts in impurtant signal per la buna collavuraziun da la Polizia chantunala cun las vischnancas e per la preschientscha da quella en il chantun. Concret surpiglia la Polizia chantunala da questas vischnancas las incumbensas da segirezza sin territori communal sco er incumbensas da basa administrativas da polizia.
RTR novitads 15:00
