Engiadina - Emprim parc da cross per passlung en il Grischun
A Samedan pon ils passlunghists trenar a moda e maniera ludica cundiziun, tecnica e coordinaziun. Il nov parc da cross consista da 16 obstachels sco undas, schanzas u slalom. Il parc da cross per passlung duai esser in'attracziun per giuven e vegl e vegn inaugurà sonda, ils 23 da december 2017.
Giuven e vegl stima il sport da passlung en Engiadin'Ota. A partir da sonda datti per els ina nov'attracziun a Samedan. Il parc da cross è l'emprim en il Grischun e duai motivar ils sportists da trenar lur abilitads a maniera ludica.
Swiss Ski ha elavurà il concept
audio
Mezdi: Emprim parc da cross per passlung a Samedan
02:44 min, ord Actualitad dals 22.12.2017.
laschar ir. Durada: 2 minutas 44 Secundas.
L'idea da realisar in parc da cross per passlunghists è nova. Il concept ha elavurà Swiss Ski, realisà il parc da cross ha la cumissiun da sport da la vischnanca da Samedan. Il parc da cross per passlunghists a Samedan duai en emprima lingia far plaschair.
Ils custs sa tegnan en il rom
Il parc da cross consista da var 16 obstachels sin in traject da rund 1 kilometer. Las investiziuns muntan a circa 10'000 francs.