In onn e mez ha la vischnanca contractà cun ils iniziants dal project «Reithalle Futura». Sco la suprastanta Regula Degiacomi ha declerà al cussegl communal, na saja quai dentant betg stà pussaivel als iniziants da confermar la finanziaziun. Quai haja sfurzà la suprastanza dad interrumper las tractativas questa stad.
Dischillus da questa decisiun
Sandrina Gruber è ina da las iniziantas dal project. Ella è dischillusa da la decisiun. Tenor ella hajan els numnadamain chattà investurs che finanziassan ils 8 milliuns francs ch'il project per in center cultural ed in lieu d'inscunter custass.
Cun las premissas actualas na veglian quels dentant anc betg sa preschentar. Tenor ella saja surtut il fatg che la halla vegniss surdada en dretg da construcziun e betg vendida pauc attractiv per ils investurs. Ina vendita n'è per la vischnanca dentant nagina opziun.
Vischnanca surpiglia puspè il lead
Era sch'ils iniziants dal project «Reithalle Futura» vulan lavurar enavant vi da lur project, ha la suprastanza da San Murezzan decidì da surpigliar puspè la planisaziun. Sco proxim vegnia ina gruppa da lavur a discutar co vinavant cun la halla, lura giaja quai en la cumissiun. La finamira saja da pudair suttametter in project adattà a la populaziun.
La vischnanca ha per quest motiv era integrà ina posiziun dad 11 milliuns francs en la planisaziun d'infrastructura, malgrà ch'ella na vuleva oriundamain betg investir agens daners en la halla.
Stabiliment da sport dal 1910
La halla da chavaltgar sper il Lai da San Murezzan è en possess da la vischnanca dapi il 1990. Cun quai ch’il tetg è periclità da crudar ensemen, na vegn la halla betg pli duvrada per il sport da chavals – e quai gia dapi il november 2013. Per sanar e reinvestir en l’edifizi, aveva la vischnanca tschertgà soluziuns cun investurs privats.
RR Actualitad 17.00