Er sche questa plazza, cun sias nov foras, è planiva e per part cun distanzas pli curtas, saja il gieu ina gronda sfida. Quai di Flavia Huder, ina amatura da golf da Samedan. Numnadamain saja la naiv pli incalculabla, tegnair la controlla da la balla e la precisiun saja fitg difficil.
La structura da la naiv è tut in’autra che quella dal pastg la stad. Controlla da la balla n'han ins propi nagina.
Ils lais schelads èn impurtants per l’Engiadina
Cun la pussaivladad da giugar golf sin il lai schelà vulan ins en emprima lingia porscher in’aventura tut speziala a giasts ed indigens, uschia Ramun Ratti, directur dad Engiadina Golf. Pudair far quai sin il lai schelà da San Murezzan haja il grond avantatg: ins po duvrar l’infrastructura existenta da las cursas da chaval White Turf.
Occurrenzas sin ils lais, sche pitschnas u grondas, sajan impurtantas per la regiun, di Jan Steiner, directur d'Engiadina Turissem SA. Numnadamain èn ils lais in «USP», pia in punct exclusiv da la regiun. Ed era sche la sfida climatica daventa adina pli gronda, stoppian ins nizzegiar las cundiziuns actualas che permettan occurrenzas sin ils lais.