Suenter mesanotg hai cumenzà dad arder entamez la vischnanca da Tuer/Taufers en la Val Müstair. Quai èn in lieu nua che las chasas en fitg datiers ina a l’autra. Perquai n’han ils pumpiers era betg gì schanzas da salvar las duas chasas ch’èn arsas giu dal tuttafatg. Tenor la presidenta communala da Tuer, Roselinde Gunsch Koch è quai in cas fitg tragic per la vischnanca. «Igl è propi terribel», di ella ad RTR.
Igl è ina catastrofa ch’insatge uschia schabegia.
«Trais famiglias èn pertutgadas, duas chasas èn brischadas cun ils clavads.» Dapi las mesa l’ina la notg sajan ils pumpiers vi da stizzar il fieu ed ussa vi da rumir. I saja chasas sper via ch’eran era bain renovadas. «Igl è ina catastrofa ch’insatge uschia schabegia», e la presidenta communala consternada.
200 pumpiers en acziun
Radund 200 pumpiers èn stads en acziun: pumpiers da la part sura dal Vnuost ed era da la Val Müstair. Las lavurs da stizzar n’èn betg anc a fin. Ferids u morts n’haja quai dà nagins, conferma Roselinde Gunsch Koch. «Ils animals han pudì vegnir spendrads ad uras, ils avdants han sentì baud avunda ch’i brischa.» Quai saja da l’autra vart era il cletg da l’entir incendi.
