Siglir tar il cuntegn
Il Hotel Bernina a Samedan
Legenda: Il Hotel Bernina a Samedan po festivar quest onn ses 150avel anniversari. RTR, A. Caprez

Engiadina Hotel Bernina Samedan vul transferir abitaziuns secundaras

Ils dretgs da las abitaziuns secundaras, ch’èn actualmain sin il quart e tschintgavel plan dal Hotel Bernina a Samedan, duessan pudair vegnir spustads en in nov project sper l’edifizi existent.

Quai tenor ils plans da la Hotel Bernina SA che vul preschentar proximamain il nov project a la vischnanca da Samedan.

Cun quest pass n'avess ins betg da separar e partir il hotel istoric en duas parts, mabain mantegnair unì el. Per la paja pudess ins vender las abitaziuns secundaras – lura construidas en in nov edifizi - gist sper il hotel da quatter stailas. Quai surtut per generar raps che vegnan duvrads urgentamain per ulteriuras investiziuns.

Nagina liquiditad

Il rendaquint da l’hotel serra numnadamain cun in minus da passa 1 milliuns francs. La liquiditad è tenor il post da revisiun cumplettamain insuffizienta e la gestiun possia be cuntinuar grazia a l’investider principal, Dante Mazzitelli. El quinta sco president dal Hotel Bernina SA ferm cun l’autorisaziun dal nov project tras la vischnanca da Samedan.

Artitgels legids il pli savens