Dapi l'onn 1921 è il sport da tir ina tradiziun impurtanta a Puntraschigna. 97 onns pli tard è il sport da sajettar anc adina preschent e cun la renovaziun da l'implant da tir puspè sin il stan il pli modern e correspunda ussa era a tut las leschas prescrittas.
Tut ils giavischs èn accumplids
Cun la renovaziun pon tut ils sportists da sajettar ed ils chatschaders trenar bain e cun la tecnica la pli moderna. I dat numnadamain in stan da tir da 25 e 50 meters per pistola, in da 100 meters, in da 300 meters, in stan da tir per la lieur ed in implant da tir da biatlon, ch'è adattà per giuvens talents ma era per profis indigens.
Motivaziun per talents giuvens
A la festa d'inauguraziun è stada preschenta era la biatleta Irène Cadurisch. Per ella è l'implant da biatlon ina gronda motivaziun, pudair trenar en Engiadina ha per ella ina grond'impurtanza. Insaquants giuvens sportists han empruvà da sajettar ed Irène Cadurisch ha accumpagnà els e dà sustegn util.
L'entira sanaziun ha custà circa 1 milliun francs. Cun la renovaziun da l'implant da tir speran ils responsabels, che la tradiziun cuntinuescha per almain ils proxims 100 onns.
-
Bild 1 von 6. Mintgin ch'ha vulì ha pudì pruvar ora da sajettar en il nov stan da biatlon cun l'agid da la biatleta Irène Cadurisch. Bildquelle: RTR, Urica Morell.
-
Bild 2 von 6. La tensiun è auta tar tuts, tutgar las schibas da biatlon è ina sfida era cun puls da paus. Bildquelle: RTR, Riccarda Müller.
-
Bild 3 von 6. Cun ils tips dad Irène Cadurisch vai dentant pli simpel. Bildquelle: RTR, Ulrica Morell.
-
Bild 4 von 6. Sajettar è dapi quasi 100 onns ina tradiziun impurtanta a Puntraschigna. Bildquelle: RTR, Ulrica Morell.
-
Bild 5 von 6. Il stand da tir da l'onn 1921 ha ussa la tecnica la pli moderna. Bildquelle: RTR, Ulrica Morell.
-
Bild 6 von 6. La festa d'inauguraziun ha attratg giuven e vegl. Bildquelle: RTR, Riccarda Müller.
RR actualitad 08:00