La renovaziun da la chapella Sontga Crusch, tar l’entrada da la claustra San Jon a Müstair ha manà diversas novas scuvridas scientificas.
Durant ils 10 onns restauraziun han ins per exempel chattà pliras novas vettas da miraglia. Tuttas datadas da differentas epocas cun picturas e frescos. La scuvrida la pli surprendenta era dentant la dataziun da la chapella sezza. Ditg resguardavan ins questa chapella numnadamain sco fabricat romanic fabritgà durant il 12avel tschientaner.
Ina dataziun dendrocronologica vi da las travs da lain han però confermà ch'era la chapella datescha dal 8avel tschientaner, analog a la baselgia claustrala da la claustra San Jon e cunquai radund 300 onns pli veglia che supponì.
Avertura suenter 10 onns restauraziuns
En preschientscha da las mungias e differents spirituals ha l'uvestg auxiliar, Marian Eleganti uss benedì la chapella. Cun questa ceremonia n'è la chapella betg pli in lieu da fabrica mabain puspè in lieu spiritual.
Sonda ils 14 da settember ha lieu il di da las portas avertas. Suenter 10 onns fabrica e custs da passa 3 milliuns francs dastga ussa era il public avair in'invista da l’istorgia da la chapella Sontga Crusch a Müstair.
RR novitads 06:00