250 persunas avessan pudì s'annunziar, mo 55 han fatg quai enfin uss. Quai è dentant en urden per ils organisaturs. Els vulan entschaiver pitschen e simpel ed uschia ramassar experientschas. La finamira saja dentant cleramain da sviluppar vinavant il product «La Diagonela», ha ditg Ramun Ratti dal comité d’organisaziun.
Collavuraziun cun il maraton ?
Ina dumonda ch’ins po far è sche la gruppa d’organisaziun enturn la cursa populara La Diagonela vul uss surpigliar ina rolla en l’organisaziun dal maraton da skis engiadinais. Quai suenter che la suprastanza da quest ha decidì da sa retrair suenter l’ediziun dal 2016. Per Ramun Ratti na è quai dentant absolutamain nagina opziun e discussiun. Els ston en emprima lingia guardar per lur product, ina collavuraziun pli stretga fiss dentant giavischada. Il comité d’organisaziun da La Diagonela è avert per discussiuns, uschia Ratti.