Causa da la naiv saj'il memia malsegir da far la cursa sin il pass da l'Alvra. Sco ch'ils organisaturs scrivan vegnia l'ediziun da stà, il Summer race da la Diagonela, stritgada dil tuttafatg per il 2017. La sonda a bun'ura èn vegnidas infurmadas las participantas ed ils participants dals organisaturs.
La partenza da la cursa per skis da rollas en tecnica classica era prevesida la sonda suentermezdi las 15:30. Ella avess manà sur 14 kilometers e 637 meters d'autezza da Zuoz via La Punt sin il pass da l'Alvra. L'onn passà avevan sa participà radund 80 atletas ed atlets.
La cursa da stà è la sora pitschna da la cursa da passlung l'enviern. Per ils passlunghists maina «la Diagonela» l'enviern sin in traject da 65 kilometers da Zuoz sur Schlarigna e San Murezzan enavos a Zuoz.
L'infurmaziun dals organisaturs
RR novitads 10:00