La locomotiva “Heidi” era oriundamain ina da charvun. Perquai che la locomotiva perdeva adina puspè sbrinzlas durant ses viadis, eran ils prads e guauds a l’ur dals binaris periclitads per incendis. Quel privel è era stà il motiv da transmidar il stgaudament da la “Heidi” da charvun sin ieli. Sper l'aspect da segirtad è la locomotiva uss er pli ecologica.
Lavur da 10 onns
Durant in decenni han Armin Brüngger ed il Club 1889, che mantegnan locomotivas veglias da la retica, renovà e restaurà “Heidi”. En tut han ils commembers investì passa 11’600 uras lavur en quella renovaziun.
Dapi il 2000 puspè en Grischun
L’onn 2000 aveva il Club 1889 cumprà la locomotiva “Heidi”, diesch onns pli tard ha ella fatg ils emprims girs da test, sin il depot da Samedan, vers Puntraschigna u era ina giada fin a Mustér.
L’onn 1902 ha la locomotiva “Heidi” custà 48’500 francs – il club 1889 ha investì passa 2,1 milliuns francs en la restauraziun.
113 onns suenter ses emprim viadi inaugural, ha “Heidi” fatg sonda ils 5 da mars ses segund viadi inaugural da Samedan a Zernez ed enavos.