Las persunas che sa preschentan online cun lur program ed in corp perfetg valan savens sco idols. Quai è en sasez bun di Andrea Ritz, trenadra da professiun. I po dentant era esser problematic. Numnadamain lura sche mintgin ha l'impressiun, mo perquai ch'el trenescha sez gugent, ch'el haja la legitimaziun da trenar auters. Quest svilup vesa ella critic. Ins stoppia schont sa dumandar, sche quai fetschia senn. Surtut perquai che la controlla in ad in manchia.
Jau sun persvasa ch'in bun trenament vul dir da far gist ils moviments e perquai dovri in trenader da professiun che controlla in ad in.
En il studio a Silvaplauna e San Murezzan dat Andrea Ritz surtut las lecziuns da gruppas. Ella ha la pussaivladad da curreger immediat sch'insatgi fa faus in moviment, tegna faus ils schanugls u las spatlas. Quai, il contact persunal, manca online.
Programs online pon funcziunar
Quai mussan blers exempels da fotografias avant e suenter in program sco size zero. Fotografias ch'ins na sa savens betg - è quai propi la realitad? Ni è quai in fake? L'exempel da Vanessa Padrun mussa ch'igl è pussaivel. Ella ha pers 10 kilos grazia in program online.