Ina gruppaziun da scolastas e scolasts da la scola industriala da Samedan ha scrit al chantun Grischun. Els teman, sin lunga vista, ina serrada da la scola sch'il chantun na reagescha betg. Schizunt sch'il chantun prevesa investiziuns en la scola industriala a Samedan na datti tenor la magistraglia nagina clera strategia per l'avegnir.
Oravant tut quai che pertutga la grondezza da classas, la qualitad d’instrucziun e la pussaivladad da pudair ir a Samedan a scola era sch'ins abita per exempel a Bravuogn u Claustra stoppian ins discutar e chattar schliaziuns. Per omadus partids èsi cler, la scola sasez, il chantun ma era las interpresas regiunalas ston far ulteriurs sforz per avair dapli emprendistas ed emprendists.
Adina damain giarsuns e giarsunas – ils problems èn divers
Il problem central è segir la demografia, plinavant decidan adina dapli giuvnas e giuvens d’absolver il gimnasi per pudair ir suenter a studegiar, uschia il president da la societad da commerzi e mastergn Engiadina Bassa, Richard a Porta. Ad els èsi conscient la situaziun precara. A chaschun da la EBEXPO a Scuol la fin dal mais avrigl vulan els perquai dar la pussaivladad a las scolas autas da la regiun da visitar ils stans per mussar l’attractivitad da far in giarsunadi.
Ils problems da chattar giarsuns èn divers
Per il falegnam Curdin Müller da Martina èsi fundamental che la scola professiunala a Samedan stoppia restar, senza quella na vegn el en l'avegnir betg pli da chattar giarsunas e giarsuns che vulan far in giarsunadi giusum l’Engiadina.
Anassia Casanova-Fedi dad Ardez lavura tar in affar da miradurs. Il cartel en Engiadina, plinavant era l’attractivitad dal mastergn sez è il problem central. Dapi tschintg onns èn els en tschertga da giarsunas e giarsuns, senza success.
Finalmain ha era il spezialist da fotografia a Scuol, Jon Andri Taisch nagins giarsuns pli. Dapi divers onns ston ils spezialists da fotografia ir a scola giu la Bassa. Da pli baud devi la pussaivladad dad ir a Samedan a scola, ma causa la spezialisaziun n’è quai betg pli pussaivel.