La vendita dal edifizi fabritgà en il 11avel tschientaner è dapi il 2004 adina puspè in tema en Engiadina Bassa. Dapi quel onn ha la famiglia aristocratica von Hessen communitgà da vulair vender il chastè. La regiun aveva sin quai pruvà d’impedir ch’il chastè na fiss suenter betg pli accessibel al public.
Pretsch da vendita è sa sbassà
Il pretsch da 20-30 milliuns francs era dentant bler memia aut. Pli tard eran las partidas sa cunvegnidas tar in pretsch da 15,5 milliuns francs per il chastè. L’import n’è la regiun dentant betg stada buna da pajar. Uss ha il chastè da Tarasp midà possessur cun Not Vital - per 7,9 milliuns francs.
Contracts sut tetg
Uss, 12 onns pli tard, è la vendita dal chastè da Tarasp gartegiada. La famiglia von Hessen venda il chastè construì en il 11avel tschientaner a Not Vital da Sent per 7,9 milliuns francs.
Co Not Vital ha publitgà sin la nova pagina d’internet verkauf-schloss-tarasp.ch riva el da pajar il pretsch da 7,9 milliuns francs dad ina vart cun agens meds e da l’autra vart cun agid d’in credit da la banca franzosa CIC.
Per il success da l’entira finanziaziun haja guardà l’interprendider e president dal cussegl administrativ da l’Institut Otalpin Ftan, Jon Peer. Ultra da quai sustegnia la Fundaziun «Ernst Göhner» ulteriuras mesiras vi dal chastè cun in credit senza fit da 500‘000 francs.
Tenor l’intenziun da Not Vital dess il chastè survegnir la furma giuridica d’ina fundaziun suenter ch’il credit da la banca è pajà enavos. Responsabla per la gestiun dal chastè sco attracziun da cultura vegn ad esser la «Fundaziun Chastè da Tarasp» che vegn presidiada da Not Vital sez. Sustegn survegn el dad Andrea Fanzun che era fin uss a la testa da la fundaziun e dal commember dal cussegl da fundaziun David Hrankovic.
Dapli dal tema
Regiun stat davos il chastè da Tarasp
Previs è er che la vischnanca da Scuol surpiglia la gestiun. Cun maximalmain 200'000 francs l’onn garantescha quella, ensemen cun la Fundaziun Chastè da Tarasp, l’access public.
L’atun passà aveva il suveran da Scuol approvà la vendita dal chastè da Tarasp a Not Vital e cun quai er suttastritgà l’impurtanza da l’edifizi per la regiun.
Attracziuns d’art
Co Not Vital aveva gia communitgà curt avant la votaziun il settember 2015, prevesa el da realisar en las miraglias dal chastè in lieu d’inscunter public cun attracziuns d’art.
RR Actualitad mezdi 11:00
