Il Piz Tschütta a Vnà è ingiantà: La firma «DSB Immobilien» ha cumprà il bajetg per 615'000 francs. Quai è gnanc la mesadad da quai che l'hotel valess. Tenor la valur commerziala valess l'hotel numnadamain radund 1,5 milliuns francs.
Plinavant surpiglia la firma da la Turgovia era l’inventari en la valita da bunamain 8'000 francs. L'ingiant dal hotel è ì fitg svelt. Be radund 20 minutas hai cuzzà. Il sulet contrahent è stada la Banca chantunala.
Tar ils dus proprietaris da la firma DSB Immobilien sa tracti dad in pèr che fa gia dapi onns vacanzas a Vnà en l’Engiadina Bassa.
Emprim hotel decentral
18 privats da Vnà avevan mess a disposiziun lur abitaziuns da vacanzas per l’hotel. L’euforia è dentant svanida svelt. Gia il 2010 eran be pli 7 da 18 privats da la partida.
Suenter dispitas en il cussegl d’administraziun il 2014 èn ulteriurs privats sa retratgs ed ils acziunaris han silsuenter decidì da vender l’hotel. La vendita n'ha però betg gì success e la Piz Tschütta SA è ida concurs il 2017. Perquai è l'hotel vegnì ingiantà.
RR novitads 15:00