Dapi ils onns 2000 s’ha il project «GiK» verifitgà en numerus chantuns da la Svizra. En Grischun datti fin uss a Cuira, Panaduz/Razén, Tavau, Domat e Landquart persunas che s’engaschan tenor il model da la Pro Senectute.
Barat da generaziuns
Central tar l’idea è ch’ils seniors accumpognan ina classa regularmain 2-4 uras per emna ed han plaschair vid il contact e la lavur cun uffants ed han pazienza e temp per communitgar e gidar ils scolars.
Agid e sustegn per magisters
6 magistras da San Murezzan èn s'annunziadas per sa participar cun lur classas al project. Sper il fatg ch’ils «Nons» e «Nonas» èn automaticamain er in agid per il magister en stanza da scola, duai il project surtut procurar in barat e la chapientscha da las generaziuns ina tranter l’autra.
Nus na tschertgain betg simplamain in bratsch gratuit che gida en scola, mabain ina situaziun da «win-win» per tut las generaziuns.
Avant ch’ina classa survegn in «Non» u ina «Nona» datti oravant discurs ed in di da fufragnar per ils seniors. Singulas persunas ch’eran preschentas a l’infurmaziun da la Pro Senectute han gia fixà in emprim inscunter, auters dals bun 15 seniors interessads èn s'inscrits per vegnir infurmà pli detagliadamain.
Non e Nona en curt en scola
Sche tut funcziuna tenor plan, uschè Othmar Lässer, duain bainbaud ils potenzials «Nons» e «Nonas» accumpagnar scolars da San Murezzan regularmain en las classas ed uschia garantir in barat tranter las generaziuns.
-
Bild 1 von 4. Dal project Nons e Nonas en scola duai profitar tut las generaziuns. Bildquelle: mad.
-
Bild 2 von 4. Sabina Wyss è ina da las 6 magistras a San Murezzan che vuless integrar in senior en sia classa. Bildquelle: RTR, Anna Caprez.
-
Bild 3 von 4. Il senior Klaus Walz da Razén raquinta da sias experientschas en scola. Bildquelle: RTR, Anna Caprez.
-
Bild 4 von 4. Radund 20 seniors da San Murezzan e conturns èn rivads en scola per s'infurmar davart il project. Bildquelle: RTR, Anna Caprez.