Cura ch’ils prads vegnan verds en la val e la naiv cuverna anc la cuntrada fin tar il cunfin dal guaud, sa repeta il fenomen dals capricorns adina puspè da primavaira. «Il retg da las Alps» sco l’animal vegn er adina puspè numnà, riva durant quel temp (per regla la fin d’avrigl fin cumenzament da zercladur) giu da la muntogna fin a l’ur da la vischnanca da Puntraschigna. Quai per chattar nutriment en furma dad erva frestga.
La stiva dals capricorns
Ina da las pli grondas colonias da capricorns en las Alps sa chatta al Piz Albris sin 3’166 meters sur mar, gist sper Puntraschigna. Tranter 30-50 animals sajan per il mument mintgamai da vesair. Tut dependent da l’aura e da la luna dals animals. Per gronda part èn quai bucs, causa che las chauras e lur ansiels restan sin distanza, pli ensi. Ch’ins na possia betg dir ch’ils capricorns sajan adina da las medemas uras al medem lieu, precisescha il guardiaselvaschina chantunal, Daniel Godli.
Restar sin las sendas
Impurtant saja che la glieud sa tegnia vid las reglas che la vischnanca publitgescha sin tavlas a l’ur da la via. En emprima lingia saja da respectar la sfera privata da l’animal e betg empruvar da s’avischinar il pli datiers pussaivel als capricorns. Ultra da quai duessan ils visitaders restar sin las vias e sendas.
I na sa tracta betg d’in zoo per charezzar bestgas.
Publicitad turistica
Dapi intgins onns fa la vischnanca da Puntraschigna reclama cun la preschientscha dals capricorns. Surtut sin ils chanals socials vegn rendì attent sin il fenomen dals animals cun las cornas imposantas. Quai conferma il directur da Puntraschigna Turissem, Jan Steiner. Per el èn ils capricorns cleramain ina purschida turistica bain vesida, surtut durant il temp da stagiun morta. Dentant vesa Steiner er la problematica cura che passa 100 persunas sa radunan il medem mument enturn in triep da capricorns, munidas cun apparats da fotografar e cameras.
RR actualitad 07:00