Il december 2020 aveva la vischnanca da San Murezzan desditg il contract cun la Engiadina San Murezzan SA (ESTM) sin la fin da l'onn 2022. Quai cun la finamira dad elavurar in nov contract pli effizient che sa cunvegn meglier cun ils basegns da la vischnanca.
Uss, suenter ch'ins haja lavurà 18 mais vi da la nova basa da collavuraziun, haja la cumissiun da turissem da la vischnanca proponì a la suprastanza communala da sortir da la destinaziun turistica. Quai scriva la ESTM en ina communicaziun. Sche San Murezzan banduna propi la Engiadina San Murezzan SA, vul la suprastanza discutar proxim glindesdi.
Nagina gronda surpraisa per la regiun
Per la regiun Malögia n'è quest fatg betg ina gronda surpraisa. Quai Andrea Gilli, il president da la regiun ditg envers RTR.
Cura che San Murezzan ha desditg il contract cun la destinaziun avain nus savì ch'els pondereschan autras variantas.
Las autras diesch vischnancas sajan cler da l'avis da cuntinuar la collavuraziun cun l'organisaziun turistica, er en cas sche San Murezzan avess da sortir. Ils proxims diesch mais hajan ins uss d'elavurar differents scenaris co cuntinuar. La nova cunvegna da prestaziun cun la destinaziun turistica – cun u senza San Murezzan – ha dad esser sut tetg per la fin da quest onn. La decisiun finala sche San Murezzan sorta u betg, vegn spetgada suenter la proxima sesida da suprastanza.
Irritaziuns en Cussegl communal
Vairamain fiss il cussegl communal da San Murezzan vegnì infurmà en sia sesida dals 27 da schaner 2022 davart il nov model d'affar. Quai n'ha dentant betg gì lieu ed ha perquai chaschunà emoziuns e diversas dumondas en il cussegl. Blers commembers han sa mussads irrità da l'agir da la cumissiun da turissem. En pli saja quai grev da chapir ch'i dettia anc adina differenzas insurmuntablas suenter avair lavurà 18 mais vi dad in nov contract.