Il defizit saja vegnì scuvert questa stad suenter la reorganisaziun da la direcziun da la destinaziun. Quai ha declerà envers RTR il president dal cussegl d'administraziun Marcus Gschwend. Ch'il preventiv saja vegnì surtratg cun passa in mez milliun francs haja tenor el da far cun la gestiun manglusa da l'anteriur CEO. Vitiers hajan examinaziuns mussà, che Gerhard Walter haja surpassà cumpetenzas e na saja betg sa tegnì vid reglements.
Renfatschas massivas
L'anteriur CEO, Gerhard Walter, refusa questas renfatschas. Sch'i dettia talas renfatschas lura saja normal ch'ins sesia ensemen e na maini da questas discussiuns betg via las medias.
Tenor Walter saja il deficit vegnì scuvert suenter la separaziun, uschia na possia el betg declerar danunder che quel vegnia. Vitiers è Walter er surstà da la communicaziun da medias dal cussegl d'administraziun. Ins haja fatg giu da betg communitgar ils motivs da la separaziun. El examineschia perquai la chaussa cun ses advocat e decidi lura tge far.
RTR novitads 17:00