Dals 9 fin als 11 da december 2016 vegn festivà l’avertura da la stagiun d’enviern a San Murezzan. Il comité d’organisaziun dal campiunadi mundial da skis 2017 è involvì e responsabel quest onn per il program. Ils 80’000 francs dovr’ins per la gascha da la musica sco er per tut la tecnica ch’i vul per in concert da quel gener.
Opening transitoric
Suenter l’ultima ediziun dal City Race, ch'aveva surpassà il rom da custs marcantamain, aveva il cussegl communal da San Murezzan stritgà la contribuziun per in’ulteriura festa. Entant è ina gruppa da lavur vid elavurar in nov concept per festivar il cumenzament da la stagiun d’enviern 2017/18 a San Murezzan.
Il fieu per il campiunadi duai arder
Per lantschar il fieu per las cursas da skis mundialas en Engiadina surtut tar ils indigens en val, è previs in concert da «77 Bombay Street» sin la Plazza Mauritius entamez San Murezzan. L’entrada è libra. Sper la musica la sonda saira, fan er part dal program da festa: visitas ocularas da las pistas, da la partenza Free Fall e da la chasa en l’arrivada a Salastrains.
RR novitads 06:00