Hansueli Bühler, il nov possessur dal Schweizerhof a Sta. Maria en Val Müstair, è gia vid la lavur per pudair avrir ses nov hotel l'entschatta da fanadur.
Nov duai il Schweizerhof attrair amaturs da töfs sco quels da Harley Davidson. Dentant er amaturs d'autos americans duain esser da chasa en il Schweizerhof.
Bühler vul offrir a ses giasts tant töfs sco era dus cabriolets per far turas davent da l'hotel. Dasperas duain era giasts che aman la natira e vulan per exempel ir a viandar esser il public dal Schweizerhof. Per Bühler n'è in hotel per amaturs d'autos americans e töfs nagina cuntradicziun per ina Val che è ina Biosfera.
Bühler vul pli tard era anc lantschar projects per la Biosfera ed uschia collavurar cun la Biosfera sco hotelier dal Schweizerhof.
RR actualitad 17:00