La midada dal clima è evidenta. Ils motivs e las consequenzas èn però dispitaivlas. Tenor il biolog Armin Deutz da l’Austria datti profitaders e perdents tar la flora e la fauna. En il rom dal Naturama dal Parc Naziunal Svizzer referescha el davart «Selvaschina e la midada dal clima».
Profitaders:
Portgs selvadis vegnan probablamain a profitar. Causa las temperaturas crescha dapli pavel era en autezzas sur 1’000 meters. En Austria èn ils portgs gia sin 1’700 meters sur mar.
Era parasits profitan da las temperaturas pli autas, sco per exempel las zeccas. Ultra da quai pon malsognas tropicas sa derasar pli levamain – quai pervi dals mustgins che survivan en regiuns ch’eran fin uss memia fraidas per els.
Perdents:
Urblaunas ed il cot selvadi perdan spazi da viver cunquai ch'il cunfin dal guaud va adina pli en si.
Selvaschina d’ungla sfessa vegn ad avair pavel da pli nauscha qualitad pervi che l’erva è pli adura madira e perda pli svelt sia qualitad nutritiva. La selvaschina ha tras quai pli nauschas cundiziuns ed è pli suttaposta a malsognas ed a parasits.
Co vinavant?
Il biolog Armin Deutz è pessimistic e prevesa che pliras plantas ed animals vegnan a svanir causa la midada dal clima. I saja però impurtant da gidar a la selvaschina, era sch’il singul na possia far bler cunter la midada dal clima. Cun bunas zonas da quietezza ed asils da selvaschina pon ins gidar fitg bain a reducir il stress, uschia che la selvaschina ha bunas cundiziuns e daventa tras quai pli resistenta cunter malsognas e parasits.
RR actualitad 17:00