Sco quai che la Gurlaina SA scriva en ses rapport annual, serra il rendaquint cun in retgav da 336’717 francs. Il deficit duess vegnir transferì sin il proxim onn da gestiun. La perdita è oravant tut d’attribuir a lavurs da mantegniment nunspetgadas.
Pervi d’ina ulteriura sfessa en il sistem da condots da l’implant per sfradar e stgaudar, haja la societad duvrà ina gronda quantitad da Freezium quai che ha chaschunà expensas extraordinarias.
Investiziuns en stabiliment
Ultra da quai ha la societad investì l’onn passà en in annex da la halla Gurlaina duas novas gardarobas cun duschas supplementaras, in nov implant cun glatsch sintetic sco er ina butia cun artitgels per hockey sin glatsch.
Sco quai che la presidenta dal cussegl administrativ, Leta à Porta, scriva en ses rapport annual, hajan ins pudì augmentar cun quellas investiziuns la purschida cumplessiva da la halla ed uschia er attrair squadras da hockey per champs da trenament durant la stad en la halla da glatsch Gurlaina.
Spargnar energia
Per garantir ina gestiun sauna er ils proxims onns, vul il cussegl administrativ megliurar l’effizienza energetica da la halla e quai cun duvrar uschè pacs mezs sco pussaivel.
La radunanza generala da la Gurlaina SA ha lieu ils 2 da zercladur 2016.
RR novitads 20:00