Engiadina - Soras Godly serran lur portas a Segl

Gia ils 3 d’avrigl han las duas soras serrà la gestiun da la Pensiun Chastè, in’emna pli tard vegnan er serradas las portas dal restaurant en la Chesa Marchetta e la Pensiun Andreola ch'èn colliadas ina cun l’autra. Co ch’il manaschi da las trais chasas duai ir vinavant e sche insumma, na vulan las Segliottas betg anc decider.

Tenor Maria Godly ch'è responsabla per l’administraziun ed il persunal na rendia l’affar da las duas pensiuns cun 42 letgs ed il restaurant betg pli. In’occupaziun da 70 % durant l’enviern e be 45% la stad na bastia betg per cuvrir tut ils custs.

Strategia ha funcziunà ditg

Il concept d’affar da las duas soras ha dentant funcziunà fitg bain durant 69 onns. Uss vess ins d’investir en l’infrastructura. Ed il cumportament dals giasts saja sa midà cumplettamain ils ultims onns. Uschia na vegnan els betg pli per duas u trais emnas en vacanzas en in lieu, mabain sa decidan a fitg curta vista da passentar in pèr dis da vacanzas.

Ina da las pli veglias stivas engiadinaisas sa chatta en la Pensiun Chastè a Segl

Vender u dar a fit

Tge che duess capitar cun ils edifizis na sappian ils quatter fragliuns betg anc – sper Maria e Christina Godly datti anc ils dus frars Linard e Gian Pol. Pussaivel fiss er da vender u da dar a fit ina da las pensiuns.

Contact cun glieud

Las proximas emnas vulan las duas soras en mintga cas pulir tut las localitads sco adina a la fin d’ina stagiun. Bain pussaivel è che Maria e Christina Godly giaudan pli tard puspè in pèr dis vacanzas a l’ester e sa decidan pli tard davart l’avegnir dals trais edifizis.

Sco che las duas soras han tradì ad RTR fissi bain pussaivel ch’ellas fan midada e passentan lur vita ils proxims onns anc en lur chasa paterna, la Pensiun Chastè a Segl.