Per las Pendicularas Motta Naluns a Scuol eran ils giasts dal Robinson Club Schweizerhof a Vulpera fitg impurtants. Radund 200 fin 300 giasts eran di per di sin la pista. Senza quels mancan ussa radund 750’000 francs en la cassa.
La scola da skis ha reducì il dumber da magisters da skis pervi da la mancanza da giasts dal Robinson Club. Ed era ils furniturs da mangiativas han pers in client impurtant. La mazlaria Hatecke ha furnì durant passa 30 onns la charn al hotel.
Novas ideas e vias
Las Pendicularas Motta Naluns han envidà tut ils giasts da l’hotel Schweizerhof ad in aperitiv ed appellà da restar fidaivels a lur regiun da skis. La scola da skis porscha quest enviern ina purschida speziala per uffants sur mezdi.
La mazlaria Hatecke expandescha. Ella avra numnadamain ina nova butia amez la citad da Turitg. Las cifras da las pernottaziuns en la regiun Engiadina Scuol èn sa reducidas pli u main per il dumber che l’hotel Schweizerhof generava.
RR actualitad 17:00