La nova organisaziun turistica da l’Engiadin’Ota, Engiadina Turissem na survegn nagin CEO. Il cussegl administrativ ha decidì da lavurar cun ina co-direcziun, sco el communitgescha suenter ina seduta da strategia. Tgi che vegn a far part da la direcziun duai vegnir communitgà aifer las proximas emnas.
En pli ha il cussegl administrativ definì ils accents per la lavur futura. Tranter auter duai la transfurmaziun digitala cuntinuar. En in proxim pass vegn il cussegl ad elavurar ensemen cun partenaris da prestaziun ina strategia da turissem regiunala. D’atun è en pli previs il process da coordinaziun cun San Murezzan Turissem, uschia che las duas novas organisaziuns turisticas pon ir en funcziun sin l’emprim schaner 2024.
Or da l'archiv
Il december 2020 aveva la vischnanca da San Murezzan desditg il contract cun la Engiadina San Murezzan SA (ESTM) sin la fin da l'onn 2022. Quai cun la finamira dad elavurar in nov contract pli effizient che sa cunvegn meglier cun ils basegns da la vischnanca.
