Per pudair planisar ils cortegis en las singulas vischnancas han pli u main tut ils lieus gì pront in'alternativa – surtut per ils cas che las restricziuns avessan valì er anc il prim da mars. Uschia ha per exempel Puntraschigna gia fatg quint che la situaziun sa midia. Tenor il co-manader da scola, Fadri Feuerstein, saja organisà tut il Chalandamarz a Puntraschigna «sco adina» – inclus il ballin per ils uffants cun musica.
Pitschnas midadas
Er cun la schluccada da las mesiras sa tegnan singuls lieus vid variantas elavuradas durant la pandemia. A San Murezzan na chantan las scolaras ed ils scolars quest onn betg en ils hotels, mabain sin las plazzas avant chasa, uschia Barbara Camichel, la co-manadra da scola.
Lavur da detagl fa prescha
Singulas vischnancas han elavurà in program per il cortegi, ed han laschà averta la dumonda davart il ballin. Perquai che quel po uss avair lieu sco usità, hai num da dar gas. Uschia tschertga per exempel la vischnanca da Zuoz a curta vista ina musica per il ballin da Chalandamarz.