Il model è bun il model sa verifitgà, da quai è il president da la destinaziun turistica Ludwig Jenal persvadì. La tschertga dad ina nova directura u directur è stada lunga e la finala n'han els betg chattà ina persuna adattada. Uschia han els elegì dus anteriurs collavuraturs, Bernhard Aeschbacher da Samignun e Claudio Daguati da Scuol. Els mainan dapi il settember 2022 la destinaziun, quai suenter che Martina Hollenstein ha bandunà.
Ils avantatgs persvadan il cussegl administrativ
Las incumbensas d'ina directura u d'in directur èn enorm vastas, saja quai sco represchentant vers l’extern, sco manadra da l’organisaziun ma er sco responsabel per in turissem dad ina gronda destinaziun. Cun duas persunas han ins ussa la pussaivladad da spartir las lavurs, ils bels muments, ma er las criticas – da quai è il president dal cussegl administrativ Ludwig Jenal persvadì.
La collavuraziun funcziuna
Las incumbensas e responsabladads dals dus co-directurs èn spartidas, ma tuttina èsi impurtant da funcziunar bain in cun tschel e quai funcziuna fitg bain, tenor Aeschbacher.
Omadus lavuran gia bunamain 10 onns tar la destinaziun. Claudio Daguati e Bernhard Aeschbacher avevan infurmà dad emprim ennà da vulair surprender la funcziun da direcziun mo ensemen.
Midaments tar il cussegl administrativ
L'anteriur president communal da Scuol Christian Fanzun ed er il commember da plirs onns Philipp Gunzinger han dà giu lur funcziun. Per els èn vegnids tschernids Curdin Thomas, cusseglier communal da Scuol e Viktor Glaser, manader da la partiziun finanzas da Scuol.
Il post dal cusseglier administrativ per Samignun resta vacant. Karl Jenal, capo communal da Samignun, è mort ultimamain. Samignun spetga giu las elecziuns communalas per communitgar la nova represchentanta u il nov represchentant en il cussegl administrativ.
