Il motiv per il plant a Cuira saja il fatg ch'ils statuts sajan vegnids modifitgads suenter la votaziun dal suveran d'Engiadin'Ota. Quai uschia ch'els cuntradian a la voluntad dal pievel, ha suttastritgà il vicepresident da San Murezzan, Michael Pfäffli vers RTR.
Cussegl da fundaziun dispitaivel
Ils midaments dals statuts pertutgan surtut la constellaziun dal cussegl da fundaziun e dal cussegl administrativ. Nov n’èn las vischnancas betg pli libras tar la tscherna da lur delegai. Els ston metter ina persuna ord la suprastanza communala en il cussegl da fundaziun.
Violà principis
Ultra da quai impedeschian las prescripziuns en ils statuts da la Fundaziun provediment da sanadad Engiadin'Ota, che persunas ch'hajan ina colliaziun cun il sectur da sanadad, na pon betg far part dals dus gremis. Tenor ina communicaziun da la vischnanca da San Murezzan haja il Cussegl regiunal violà ils dretgs politics da la populaziun d’Engiadin’Ota, sco er il princip da la separaziun da las pussanzas e da l’autonomia da vischnanca.
Tenor Michael Pfäffli saja grev da giuditgar quant ditg ch’ins haja da spetgar sin ina resposta da Cuira en chaussa. Empè da surlaschar il midament da statuts simplamain a la nova Regiun Malögia, haja la vischnanca da San Murezzan dentant vulì ir a la segira ed ha perquai inoltrà plant tar la Dretgira administrativa.
RR actualitad 11:00