Las renfatschas èn las medemas: la regenza grischuna n’haja betg midà ils puncts che pertutgan il rumantsch grischun en scola. Uss dettia be 2 pussaivladads per cuntanscher quella finamira. U bain ina votaziun dal pievel ubain la via politica ch’ins vuless instradar ensemen cun la Lia Rumantscha. In inscunter tranter las 2 organisaziuns Pro Idioms e la Lia Rumantscha duai dar proximamain, han infurmà ils presidents Domenic Toutsch (Pro Idioms Engiadina) e Lorenz Alig (Pro Idioms Surselva) en preschientscha dal secretari general da la Lia Rumantscha, Urs Cadruvi.
Premi idiomatic per „A Sent be rumantsch“
La Pro Idioms Engiadina ha surdà a chaschun da sia radunanza generala il premi idiomatic a la gruppaziun da Sent. Quella porscha dapi il 2011 in curs da rumantsch a persunas interessadas per viver durant in’emna cun famiglias indigenas. Ellas s’obligheschan da discurrer durant quest temp be rumantsch. L’ultim premi idiomatic aveva la Pro Idioms Engiadina surdà a Renata Bott da Valchava.