Siglir tar il cuntegn

Engiadina Era Scuol vul salvar il label Unesco da la Biosfera Val Müstair

Il suveran da Scuol ha approvà cun gronda maioritad il contract da cooperaziun dal Reservat da Biosfera Val Müstair Parc Naziunal: quai cun 491 vuschs gea cunter 113 na.

Legenda: Guardar il video «In cler gea per la biosfera». Durada 2:56 minutas.
Or da Actualitad video dals 29.11.2015.

Scuol vul empruvar da salvar il label Unesco da la Biosfera ensemen cun la Val Müstair e cun il Parc Naziunal. Suenter il cler gea da Scuol han ussa tut ils trais partenaris ditg gea al nov contract da cooperaziun. La Val Müstair ed il Parc Naziunal avevan ditg gea già la fin da la stad al nov contract.

Paris sto decider

Cun il nov contract da cooperaziun tranter Scuol, il Parc Naziunal e la vischnanca da Val Müstair èn ussa realisads passa 60% da la zona da tgira enturn il Parc Naziunal che è la zona da minz dal reservat da Biosfera Val Müstair Parc Naziunal. La zona da tgira enturn il Parc Naziunal è ina pretaisa da l'Unesco per mantegnair il label Unesco da la Biosfera.

Suenter il na da Zernez e S-chanf a l'emprim contract da cooperaziun, n'èsi dentant betg pli pussaivel da realisar l'entira zona da tgira. Sche l'Unesco conceda vinavant il label Unesco a la Biosfera Val Müstair era cun mo 60% da la zona da tgira, sto l'Unesco a Paris decider.

Be 18% da las persunas cun dretg da votar èn sa participadas a las votaziuns.
Legenda: ANR, O. Seifried

Ulteriuras decisiuns da Scuol

Plinavant han ils votantas e las votantas approvà cun cleras maioritads la lescha d'ustaria, la lescha da persunal e la lescha davart la remuneraziun per autoritads e cumissiuns. 18% da las persunas cun dretg da votar èn sa participadas a las votaziuns.

RR novitads 11:00