Siglir tar il cuntegn

Header

cuntegn

Engiadina «Esser president è ina fitg bella funcziun»

Quai di Andrea Gilli suenter passa 100 dis sco president communal da Zuoz. El haja pudì surprender ina vischnanca che funcziunia bain e possia uschia sa concentrar sin dumondas strategicas.

Dapi ils 1. da fanadur è Andrea Gilli president communal da Zuoz. Dapi lura haja el constatà che l'administraziun funcziunia perfetgamain e ch'i saja vegnì fatg fitg buna lavur ils davos onns.

audio
Bunura: Andrea Gilli dapi passa 100 dis capo da Zuoz
ord Actualitad dals 30.10.2018.
laschar ir. Durada: 2 minutas 42 Secundas.

El possia perquai sa concentrar sin dumondas strategicas. Uschia saja el actualmain londervi cun ses cussegl communal da surlavurar la strategia 2025 per Zuoz. Tranter auter duai la vischnanca vegnir recepida sco lieu da scola e sco lieu cultural.

La primavaira 2019 duai la nova strategia vegnir preschentada en ina radunanza communala.

Sfidas variadas

I detta dentant era diversas sfidas da schliar, di Andrea Gilli. Da la vart turistica dettia quai deficits che pertutgan la collavuraziun cun la regiun turistica Engiadin'ota e cun la Plaiv. Ils mastergnants en vischnanca hajan da cumbatter ed il center communal haja pers attractivitad. Per tut quai dovria soluziuns.

Suenter 100 dis en uffizi è Andrea Gilli dentant persvas d'avair tratg la gista decisiun cun daventar president communal da Zuoz. El saja numnadamain motivà da lavurar vi da questas sfidas e da sviluppar enavant sia vischnanca per l'avegnir.

RR actualitad 07:00

Artitgels legids il pli savens