Dapertut en il Grischun sa preparan per il mument candidatas e candidats che vulan far la patenta da chatscha sin l’examen da tir che ha lieu la fin da fanadur. Ir a chatscha, ina passiun che fascinava enfin uss oravant tut ils umens. En l'Engiadina Bassa datti quest onn però per l’emprima giada in’auter purtret. Per l'emprima giada treneschan dapli dunnas ch'umens per la patenta. Da 19 persunas en l'Engiadina Bassa èn numnadamain 12 dunnas candidatas – dapli che la mesadad, quai è in nov record.
Adina dapli dunnas ma anc adina pli blers umens
Las experientschas da Ladina Kirchner, Michelle Nef e Braida Nesa èn differentas en la sparta anc adina dominada dad umens. Ils ins chattan bel da vesair che l'interess tar las dunnas crescha ad in crescher. Ma auters èn anc adina da l'avis che la chatscha duess restar en ils mauns dals umens. Per il pli sajan las reacziuns dentant positivas.
Tenor Mario Duschén, l'instructur da chatscha en l'Engiadina Bassa, sajan las dunnas gist tar il sajettar pli ambiziusas ch'ils umens. A lezzas na tanschia betg da be tutgar. Ellas veglian dar adina il meglier.
