Il stgaudament da chalur a distanza era l'entschatta pensà per sia lainaria. Igl era dentant spert clar a Simon Salzgeber, sche quai duai render en ina maniera u l'autra stoppia el far insatge pli grond.
Oz stgauda el S-chanf, prest era parts da Zuoz ed il Lyceum Alpinum. Quai era la finamira dal possessur da la firma Simon Salzgeber - numnadamain avair in grond client sco il Lyceum. Ch'il client grond è uss a Zuoz è sa dat uschè. Per trar las lingias da S-chanf a Zuoz ha el investì radund 3 milliuns francs.
7-avla etappa dapi il 2010
Il stgaudament da chalur a distanza è en funcziun dapi l'onn 2010, dapi la è la rait adina creschida. Ir a Zuoz e colliar il Lyceum è uss la 7-avla etappa dal project. In'ulteriura segua l'onn 2017 cun colliar la zona da masteranza a Zuoz.
Ed era en avegnir vul Simon Salzgeber investir per avair enavant la pussaivladad da colliar ulteriuras chasas vi da ses stgaudament da chalur a distanza.