Aura bletscha, fraida e fasas curtas cun bell’aura, ma la qualitad tuttina sur la media dals ultims onns. Quai è in’emprima bilantscha davart la racolta dal fain en il Grischun da l’Uniun purila grischuna. Per tuts n’è la stagiun betg anc finida. En Engiadina èn ils purs actualmain vi da far fain da munt.
Buna racolta, buna qualitad
La famiglia Lenz da Madulain fa fain sin passa 2'000 meters sur mar – numnadamain sin il pass dal Bernina, 21 kilometers davent da lur bain a Madulain. Er en ils auts è la racolta ed era la qualitad dal fain buna quest onn, conferma Silvio Lenz. Ed era sch’il far fain sin quest’autezza è ina sfida e pretenda dapli lavur a maun, giaudan ils Lenz quests dis da lavur.