A Dumeng e Gian Giovanoli collian bleras passiuns. Oravant tut dentant ina, il cuschinar. Tuts duas han numnadamain emprais il mastergn da cuschinunz. Ed uss èn els era auturs da lur emprim cudesch da cuschinar. In cudesch in zic pli spezial.
Per ina n’è il cudesch betg mo in solit cudesch da recepts cun creaziuns culinaricas, mabain in’invista persunala en la vita da la famiglia Giovanoli. E plinavant han ils dus auturs creà tut il cudesch sez, da l’entschatta a la fin.
Cumenzà ha tut il project avant radund dus onns. Quai a chaschun dal giubileum da 100 onns da la Pensiun Privata, l’hotel da la famiglia Giovanoli. Prevesì era atgnamain in cudeschet cun recepts da la famiglia per regalar als giasts fidaivels. Dapi alura è il cudesch creschì da cuntin, e cumpiglia ussa pli che 150 recepts cun istorgias persunalas ord la vita da la famiglia Giovanoli.