Siglir tar il cuntegn

Header

cuntegn

Engiadina Fasa da fabrica cumenza per hotel Grace San Murezzan

L’anteriur hotel La Margna visavi la staziun vegn renovà cumplettamain ed engrondì cun in edifizi annex. La substanza architectonica da l’hotel vul la gruppa exclusiva «Grace Hotels» restaurar cun premura, ed il nov alloschi vul ella lura preschentar l’atun dal 2019.

audio
Il caracter da la veglia dama duai restar
ord Novitads dals 30.09.2016.
laschar ir. Durada: 1 minuta 12 Secundas.

Il nov hotel Grace San Murezzan vegn ad esser in hotel da la classa da luxus cun 56 stanzas e suitas, trais restaurants ed ina gronda partiziun da Spa sin ina surfatscha da 800 meters quadrats. Previs è che l’hotel resta avert durant 10 mais l’onn.

Infurmà vischins

Per avertir a tut las persunas involvidas davart la fabrica dals proxims trais onns, han ils responsabels envidà ad in’infurmaziun. Envidads èn stads tant ils represchentants politics da San Murezzan, sco er ils vischins che vegnan ad esser pertutgads da las emissiuns da canera e da pulvra ils proxims mais.

Montascha da grus pir suenter campiunadi

La realisaziun dal project è planisada uschè che las emissiuns ed ils impediments dal trottuar e da la via restan limitadas sin in minimum, han declerà ils patruns da fabrica. Entant ch’ins cumenza bainbaud cun il stgav per la garascha sutterrana, vegnan montads ils grus gronds pir suenter il grond eveniment d’enviern a San Murezzan, ils campiunadis mundials da skis 2017.

Davart l’import che la possessura da l’hotel La Margna vegn ad investir en la renovaziun na veglian ins betg discurrer, ha declerà il represchentant dals patruns da fabrica, Peter Schmid.

Artitgels legids il pli savens