L'emprim inscunter hajan els fatg en trais, senza club e senza cassa, di Nuot Padrun, president e co-fundatur da l'Almatrak Club Engiadina. Sch'igl avess dà in deficit avess mintgin pajà insatge.
Ma l'emprim inscunter 2015 a La Punt Chamues-ch è stà in success ed ils trais organisaturs han decis da fundar in club per maschinas e tractors vegls. Il num «Almatrak» vegn da «Alte Maschinen und Traktoren».
Dal Grischun, da la Svizra ed ord Germania
Mintga dus onns datti l'inscunter da tractors en l'Engiadina – cun excepziun dal temp da Corona. E per questa fin d'emna spetga Nuot Padrun radund 100 tractors e maschinas veglias da tut il Grischun, da la Svizra e schizunt da la Germania.
In participant vegn da passa 770 kilometers davent da l'Engiadina e be per l'occurenza.
Sin il program stattan spassegiadas cun ils tractors a Bever ed a Zuoz, preschentaziuns dals vehichels istorics e dus dis da festa a Zuoz.
I vegn premià il pli bel oldtimer ed il meglier manischunz che sto far in percurs, nua ch'el sto tranter auter derscher exact in liter aua en in zaiver.
Betg in Saurer – mabain in Hürlimann
Nuot Padrun leva suenter sia pensiun atgnamain restaurar in vegl camiun da Saurer – sco anteriur chauffeur da camiuns. Quai fiss dentant stà in memia grond sforz da chattar ina halla per il camiun grond. Perquai ha il president dal club Almatrak survegnì avant 12 onns in tractor dal 1959 e restaurà quel en atgna reschia.
Il tractor da la marca Hürlimann è quasi il Ferrari dals tractors vegls.
Sco tractor oldtimer valan vehichels ch'èn passa 30 onns vegls. A Zuoz vegnan dentant era mussads tractors pli giuvens. Ins possia entras quai era mussar il svilup da divers models, di Nuot Padrun.
Da viadi cun l'agen grill
L'inscunter da tractors n'è betg il sulet eveniment en il chalender dal club. Ils 55 commembers da tut l'Engiadina, Val Müstair e dal Puschlav s'inscuntran ina giada al mais a Zuoz per in «Höck» – per discutar davart ils tractors e star da cumpagnia. Ed era d'ir a grillar la stad è planisà.
Nus avain era fabritgà ina remortga cun si in grill e prendain cun nus tut per in bel mangiar.
Il club è era gia stà da viadi en il Tessin u en il chantun Sursilvania, cun ils tractors e 20 km/h. Il president sa legra ch'il club è creschì ils davos onns e ch'i dat era ina generaziun giuvna da l'Almatrak.
Or da l'archiv