Siglir tar il cuntegn

Header

Mario Riatsch tar in dals fastizs ch'el ha chattà. (2018)
Legenda: Mario Riatsch tar in dals fastizs ch'el ha chattà. (2018) MAD
cuntegn

Fastizs da dinosaurs a Scuol «In indizi impurtant per la scienza»

L'onn 2018 ha Mario Riatsch da Sent chattà plirs fastizs da dinosaurs. Quai sin bunamain 2'900 meters sur mar, sin il Piz S-chalambert Dadaint sin il territori da la vischnanca da Scuol. Il professur da l'universitad da Basilea Christian Meyer ha questa stad prendì sut la lupa quels fastizs. Tenor el èn quels «in indizi impurtant per la scienza».

Ils fastizs èn l'emprima cumprova insumma, che duas sorts da dinosaurs han vivì durant la medema perioda da temp – numnadamain avant var 212 milliuns onns. Fin uss avevan ins pensà, che quellas duas sorts (prosauropods e sauropods) n'hajan betg vivì durant il medem temp. La scienzia supponiva ch'ils sauropods sajan sa sviluppads or dals prosauropods.

Ils fastizs

Il professur Christian Meyer ha ditg, ch'ins possia leger bler ord fastizs, tranter auter la grondezza d'in animal. L'autezza dal chalun dal dinosaur saja en quest cas stà 1,6 meters, sia lunghezza stimada saja tranter 3 e 4 meters. Era la sveltezza possian ins leger or dals fastizs. Il dinosaur saja currì cun var 35 kilometers l'ura sur il S-chalambert.

Ina copia da quels fastizs chattan ins uss er en il Museum da la natira a Cuira.

RR actualitad 17:00