Fauna e flora da la Val Mora en il focus

9 giuvnas e giuvens da 9 pajais europeics han prendì l’emna passada la biologia muntagnarda en Val Müstair sut la marella. Lur perscrutaziun stat sut la batgetta da la Fundaziun scienza e giuventetgna da Berna. Il project da perscrutar cuminaivlamain exista dapi il 1967.

En tschertga da fauna e flora en Val Mora

Co sa cuntegnan gruppas da capricorns? Tgeninas differenzas dat igl tranter animals feminins e masculins? Nua e co creschan orchideas en Val Müstair? Questas eran tranter autras las dumondas ch’ils giuvens e las giuvnas han prova da respunder entras la perscrutaziun champestra.

En 7 gruppas da 2 enfin 4 persunas èn els sa mess vi da lur projects cun agid da scienziads, spievels da champagna e marellas. Hans Schmocker, il responsabel dal project en Val Müstair è stà intgantà da la marveglia e da l'inschign dals perscrutaders-novizs.

«  I na sa po quasi betg imaginar ch’i dat era oz anc uschè blers giuvenils ch’èn uschia amiaivels e chars. »

Hans Schmocker
Responsabel dal project en Val Müstair

Tar la scienza tutga era la preschentaziun dals resultats

Quella è stada il venderdi passà en l’auditori dal Parc Naziunal Svizzer a Zernez. Per englais han ils giuvens e las giuvnas descrit lur inscunters cun tavauns, serps e marmottas en ina preschentaziun publica.

Da collavurar cun l’Europa per projects scientifics cun giuvenils saja vegnì pli difficil. Quai ha ditg Karin Suter-Burri, la manadra dal project e vicedirectura da la Fundaziun scienza e giuventetgna, a Zernez envers l’agentura da novitads rumantscha ANR. Tuttina saja vegnì cuntinuà cun il project.

Avrir portas en omaduas direcziuns

La lavur internaziunala cuminaivla resta per Karin Sutter-Bieri ina finamira impurtanta da la Fundaziun scienza e giuventetgna. Ella avra portas en tuttas 2 direcziuns: Dad ina vart organisescha arranschaments sco la «International Wildlife Research Week», nua che giuvenils da l‘Europa survegnan la pussibilità da frequentar in Svizra projects da perscrutaziun.

Da l’autra vart han giuvenils svizzers, che han gudagnà premis da la concurrenza naziunala, la pussibilità da visitar exposiziuns scientificas e concurrenzas en l’ester sco per exempel il «European Contest for Young Scientists».