Al Festival da Jazz San Murezzan èn passa 40 bands sa preschentadas quest onn. Tut en tut hai dà radund 70 concerts sin 10 differents palcs. Cifras pli concretas na dettia il mument anc betg. Tenor la pledadra dal Festival da Jazz, Melina Maret-Roshard, vegnia publitgà pli tard in rapport per ils partenaris e sponsurs. Gia uss constatescha ella ch'i n'haja dà nagins incaps pli gronds. Ultra da quai è il Festival en Engiadina l'unic ch'è vegnì organisà malgrà la pandemia ils ultims dus onns, suttastritga la pledadra.
Concerts vendids ora malgrà l'aura
Cuntents èn ils organisaturs surtut che la gronda part dals concerts è stada vendida ora. Quai malgrà la plievgia che ha savens accumpagnà il public durant ils concerts sut tschiel avert. Oravant tut quel cun il chantadur talian Zucchero u er cun la chantadura da soul da l'Engaltierra, Joss Stone.
Per l'emprima giada insumma è in premi da promoziun vegnì surdà al Festival da Jazz. Tenor la pledadra saja quai sa cumprovà e vegnia cunquai manà vinavant ils proxims onns.