Entschet ha tut l’istorgia avant radund 500 onns, nua ch'il politicher Gian Travers ha scrit l’emprima istorgia per rumantsch. Durant la guerra cun la Vuclina ha el scrit il toc «la guerra da Müs». Zuoz saja la tgina dal rumantsch per scrit e cun quai adattà sco center cultural per la lingua rumantscha, uschè il cusseglier communal responsabel per la cultura a Zuoz, Luzi Schucan.
Il festival travers 2023 ha lieu a partir dals 6 – 8 october. Sper il teater han era autras occurrenzas culturalas lieu, per exempel il cumediant Flurin Caviezel, ma era chant e musica rumantscha.
Surdada da premi avant in onns
La surdada dal premi ed il festival han lieu alternant. Il november 2022 ha Selma Mahlknecht da Zernez retschet il premi travers 2023 dotà cun 15’000 francs. E l'october da quest onn vegn quest teater da Selma Mahlknecht giugà a Zuoz.
Ina sbrinzla – ina grotesca ostalpina
L'autura ha survegnì il premi per il toc «Üna sbrinzla da spranza per S-chus-ch». Quel tracta d'in vitg idillic ch'è smanatschà da depopulaziun ed impovriment. Tut che sa lamenta, ma nagin che fa insatge. Fin a quel di nua ch'in investider prevesa da transfurmar il vitg en in paradis da vacanzas. Ils ins èn fieu e flomma, auters èn sceptics e sa dostan.