La 39avla ediziun ha cumenzà venderdi cun bell'aura. Sonda hai pluvì in zic, però èn tuttina giuven e vegl sa scuntrads a S-chanf. Dentant n'han ins ditg betg propi savì, sch'i gartegia insumma – las prognosas da l'aura n'eran avant betg stadas evidentamain cleras.
A l'Open Air Chapella, il pli vegl open air dal Grischun, pon ins udir bands rumantschas e grischunas, da la Svizra Orientala, ma er acts internaziunals.
Controlla inevitabla
Er a l'Open Air Chapella ston vegnir resguardads tscherts puncts areguard Covid-19. A l'entrada vegnan fatgas controllas da certificats – tgi che n'ha nagin po laschar far in test per entrar.
Fatg in onn pausa – betg l'emprima giada
L'onn passà n'han ins cuntrari a la speranza dal comité d'organisaziun betg pudì realisar l'open air. La raschun è stada, sco tar blers auters festivals er, la pandemia da corona. Perquai èn ils organisaturs anc pli cuntents ch'ins po finalmain puspè realisar il festival.
La pausa dal 2020 n'era dal reminent betg l'emprima giada ch'ins ha stuì laschar ora in onn: Il segund onn dal festival – l'onn 1981 – ha il comité d'organisaziun passentà ses temp en la scola da recrut ed uschia betg pudì sa deditgar a l'open air.
