Minna Prader è naschida, viva e lavura in Frantscha. Sia tatta Silvia Schucany ed il tat Andrea Prader eran da Ftan. Ella ha adina gì ina stretga relaziun cun els ed adina fat vacanzas a Ftan. Anc oz vegn ella en Engiadina per chattar il ruaus e per scriver – ed era per chattar inspiraziun.
Durant ina spassegiada sur Ftan, ina fracziun da la vischnanca da Scuol, ha Minna Prader inscuntrà in buob che clegeva fluras. Malgrà ch’ella discurra francos ed il buob mo rumantsch han els gì in interessant inscunter.
Questa situaziun è effectiv capitada ed uschè hai jau scrit il toc «massellas cotschnas».
Il film raquinta da Fadri, in mat da 7 onns, e da Zora, ina dunna da 30 che abita a Genevra e riva a Ftan in vacanzas cun l'ami. Fadri discurra mo rumantsch e Zora mo franzos, ma tuttina s’enclegian els dus zunt bain e constateschan: Fadri cumbatta encunter ina gronda suldina e Zora viva en ina relaziun malsauna.
Pervia da l’inscunter da Fadri e Zora constateschan omadus l’urgenza da midar insatge per daventar fortunads.
Il film vegn finanzià dal uffizi federal da cultura e da RTS. Il film vegn realisà en vischinanza da Ftan durant il mais avust.
Minna Prader è da naziunalitad svizra e franzosa. Naschia l'onn 1990, è ella creschida sì en in lieu suburban da Paris. Suenter in studi da litteratura e filosofia ha ella fatg in master en scienzas da film cun focus sin scriver scripts.
Ella ha lavurà sco directura da casting per plirs films curts e films dramatics e realisà agens projects.