L'onn 2018 ha la Svizra decis da stritgar las 112 fortezzas ch'existan en tut la Svizra da la strategia militara. L’argument principal è stà, ch'il purtret dal inimi saja sa midà ils davos onns.
Ier strict secret – oz accessibel
Enfin dal 2003 ha la Svizra investì milliuns da francs per fabritgar fortezzas, e mo avant paucas emnas eran quellas anc secretas. La fortezza Pila a Malögia è l’emprima fortezza en Svizra che daventa accessibla per tut la populaziun.
Fortezza Pila daventa attracziun turistica
Pila è ina da las grondas e pli modernas fortezzas. Quella è vegnida fabritgada dals onns 1990 enfin il 2003. Ussa ha la societad «Pro Castellis» surpiglià questa fortezza e la restaurà. Bregaglia Turissem ha ussa lantschà in project numnà «Mythos Festung Engadin». Guidas duessan manar la populaziun indigena, ma era giasts da la Bregaglia tras ils labirints profund en la terra.
Amaturs da las fortezzas deploreschan la decisiun politica da laschar crudar las fortezzas – quellas avevan tenor els in'impurtanta funcziun. Questas fortezzas sajan construidas cun daners publics, e perquai saja pli che gist d'avrir ellas per in e scadin.