Durant in onn hajan ins collavurà cun Fräsy Föhn. Durant quel temp hajan ins dentant constatà differenzas quai che pertutga la strategia per l’avegnir. Quai ha ditg il co-directur da la destinaziun turistica, Bernhard Aeschbacher, sin dumonda da RTR. Ils anteriurs presidents en stads persunas indigenas e quellas avevan in autra rait da contacts per collavurar ensemen. Segir saja quai era stà in dals motivs da la desditga, uschia il co-directur.
Soluziun ad interim
Fräsy Föhn è vegnì elegì l’onn passà sco nov president d’organisaziun da las duas cursas. Per il bike-maraton dal Parc Naziunal ch'ha lieu la fin dal mais avust datti ina soluziun ad interim. Il manader da la cursa Flurin Bezzola e la secretaria generala da la cursa Chantal Mayor surpiglian per quest onn l’organisaziun.
