Siglir tar il cuntegn

Header

cuntegn

Franco Milani «La trilinguitad vegn sutvalitada en Grischun»

Quai di Franco Milani, il president da la Pro Grigioni Italiano. Ed era il sustegn politic saja memia flaivel.

Blers Grischuns na sajan betg conscients che la trilinguitad saja ina ritgezza per il chantun Grischun, ina caracteristica, la basa per la cultura grischuna. Perquai dettia quai era anc adina discriminaziuns per ils Grischuns talians.

audio
Bunura: Franco Milani – Pro Grigione Italiano davart il talian
ord Actualitad dals 12.08.2019.
laschar ir. Durada: 3 minutas 59 Secundas.

A questa conclusiun saja era vegnì in studi dal Center per democrazia Aarau. Tant en l'administraziun sco era en la scola dettia mancos tar il sustegn dal talian. Tranter auter manchian mezs d'instrucziun talians. Franco Milani di perquai cleramain:

La politica fa memia pauc per promover la trilinguitad, per sustegnair las duas linguas minoritaras dal chantun Grischun.
Autur: Franco Milani president PGI

El spera perquai che la festa da la Lia Rumantscha lantschia ina discussiun davart la trilinguitad en il chantun Grischun e che questa discussiun augmentia lura era la conscienza per questa spezialitad grischuna.

Il talian è impurtant per l'economia

L'iniziativa per mo ina lingua estra en la scola primara haja mussà che l'acceptanza per la plurilinguitad dal Grischun na saja betg en l'entir chantun avant maun. E gist l'argument che l'englais saja pli impurtant per l'economia na vesa Franco Milani betg.

La lingua discurrida il pli savens en l'economia grischuna suenter il tudestg è il talian e betg l'englais.
Autur: Franco Milani president Pro Grigioni Italiano

Il talian haja da cumbatter sin differents champs en congual cun il rumantsch. La pli gronda differenza saja quella, ch'ils Rumantschs creschian si per gronda part bilings entant che blers Italofons creschian si monoling. Perquai fissi per ils Italofons bler pli impurtant d'avair tut ils servetschs era per talian.

RR actualitad 07:00

Artitgels legids il pli savens