Ils campiunadis mundials da freestyle il mars 2025 han chaschunà discussiuns. Era sch'igl ha ord vista sportiva funcziunà tut sco planisà durant l’event, è restà enavos in grond deficit. Ils campiunadis mundials han scrit cifras cotschnas da circa 4,7 milliuns francs.
La vischnanca da San Murezzan desista
Sco pli grond creditur da l'evenimet ha la vischnanca desistì sin radund 1,6 milliuns francs. Per vegnir a savair tge sbagls ch'èn capitads durant l’organisaziun, e pertge ch'ils campiunadis mundials da freestyle en l’Engiadin’Ota han chaschunà uschè in grond deficit, ha il parlament fatg ina sesida extraordinaria e publica per discutar quests fatgs.
Organisar saja stà difficil
La vischnanca da San Murezzan ha laschà far in studi extern per analisar l’organisaziun dals campiunadis mundials e chattar ils sbagls. En emprima lingia era l’organisaziun sezza betg adattada a la lezia dad uschè in event unic. Unic perquai ch’ils campiunadis mundials da freestyle in Engiadin’Ota eran ils emprims en questa furma e cun bleras disciplinas ad in lieu. Terren nov betg be per la societad purtadra, ma era per las autras organisaziuns involvadas. Quai ha chaschunà ina sutvalitaziun da las lavurs e dals custs.
Sco exempel han ils responsabels dal campiunadi mundial da freestyle menziunà las cifras dals atlets ed atletas ch'èn sa participads. La Federaziun internaziunala da skis, la FIS, aveva sutstimà quest dumber ed aveva pir communitgà curt avant l’event las cifras gistas. Quellas avevan redublà il dumber dals atlets ed atletas.
Professiunalisar per evitar talas situaziuns
En la sesida extraordinaria dal parlament da San Murezzan han ins lura era preschantà soluziuns a basa da las discussiuns. Ins vul professiunalisar las structuras dad events gronds en la regiun d’Engiadin’Ota.
Da prim davent aveva l’event da freestyle betg glieud professiunala en l’organisaziun. Per spargnar han ins engaschà glieud en uffizi d’onur e ch'ha fatg lavur parziala. Quai duai sa midar per events futurs, per evitar uschè gronds deficits sco per ils campiunadis mundials da freestyle 2025.