Uss è cler, quant grond ch'il deficit per ils campiunadis mundials da Freestyle a San Murezzan/Silvaplauna è: 4,7 milliuns francs. Per Sigi Asprion, il president da la societad purtadra, è ultra dals motivs enconuschents – 1'000 atletas ed atlets dapli che planisà, l'ennavada artifiziala e la vendita dischillusiunanta da bigliets da concerts – er il stimar il preventiv la stad avant in grond problem.
Ils ultims mais saja il team enturn Sigi Asprion stads en tractativas cun partenaris ed era cun crediturs, per evader in concurs da la Societad purtadra.
Impedir il concurs
Quai è gartegià. Tenor Asprion han ins pudì impedir il concurs da la societad, ed uschia han tut ils crediturs survegnì almain ina part da lur daners. Quai era be pussaivel, perquai che tscherts partenaris ed era il maun public han desistì sin ina part dals daners. Tranter quels era er la vischnanca da San Murezzan, ch'aveva curt avant il campiunadi dà in credit supplementar da dus milliuns francs.
Vischnanca vul elavurar il campiunadi
La vischnanca da San Murezzan ha fatg far uss ina analisa externa en chaussa. Quai per chattar ora, sche quest eveniment ha purtà insumma insatge a l’Engiadin’Ota ed era nua ch'èn capità sbagls tar l'organisaziun. Questa analisa duess vegnir preschentada l'avrigl da quest onn.
Betg cuntent cun il deficit – però cun las autras cifras
Il campiunadi mundial da freestyle 2025 è stà la fin da mars durant duas emnas cun occurrenzas da snowboard e skis ed ha tenor la societad d’organisaziun purtà hotels plains en tut l’Engiadin’Ota. Era plaschaivel sajan ils bundant 300 milliuns aspectaturs ed aspectaturas sin l'entir mund che han guardà las cursas ed occurrenzas en la televisiun, quai tenor cifras da la FIS.
Però haja l'organisaziun era gì da prender en maun dapli daners che pensà. Quai pervi da las pernottaziuns supplementaras ch'ils 1'800 atlets ed atletas han chaschunà. L'organisaziun aveva fatg quint be cun 800 persunas. Ma era la situaziun da la naiv n'è betg stada ideala.
L'emprim hajan ins pervi da la mancanza da naiv stuì far supplementara. E curt avant il campiunadi mundial haja quai lura dà ina navada, e quella haja gì num rumir davent. Era quellas sfidas hajan chaschunà dapli custs per l’organisaziun, ha ditg il president Sigi Asprion l'onn passà.