Uss è cler, quant chal deficit per ils campiunadis mundials da Freestyle a San Murezzan/Silvaplauna è: 4.7 milliuns francs. Per Sigi Asprion, il president da la societad purtadra, è ultra dals motivs enconuschents – 1'000 atletas ed atlets dapli che planisà, l'ennavada artifiziala e la vendita dischillusiunanta da bigliets da concerts – er il stimar il preventiv la stad avant in grond problem.
Igl era in evenimaint, nua che ins ha stimà las cifras per il budget. Usche ha quai gi in grond effect sin il deficit.
Ils ultims mais saja il team enturn Sigi Asprion stads en tractativas cun partenaris ed era cun crediturs, per evader in concurs da la Societad purtadra.
Impedir il concurs
Quai è grategià. Tenor Asprion han ins pudì impedir il concurs da la societad, ed usche han tut ils crediturs clappa almain ina part da lur raps. Quai era be pussaivel, pervi cha tscherts partenaris ed era il man public han desistì sin ina part dals raps. Sut quels era er la vischnanca da San Murezzan, che vaiva curt avant il campiunadi dat in credit supplementar da duos milliuns francs.
Vischnanca vul elavurar il campiunadi
La vischnanca da San Murezzan ha fatg far uss ina analisa externa en chaussa. Quai per chattar oura, sche quest evenimaint ha purtà insumma insatge a l’Engiadin’Ota ed era nua che èn capità sbagls pro la organisaziun. Quella analisa dess vegnir preschentada en avrigl da quest onn.
L'istorgia fin a quest mument
Il campiunadi mundial da freestyle a San Murezzan e Silvaplauna scriva cifras cotschnas. Sco quai ch'il president da la societad Campiunadi mundial Freestyle 2025 Sigi Asprion ha ditg envers RTR, resulta segir il deficit prognostitgà da radund 2,5 milliuns francs. Quai è bundant il dubel da l'import che la societad aveva communitgà avant in pèr mais. Il rendaquint detaglià duai vegnir preschentà la fin d'avust. Lura saja er previs d'inoltrar ina dumonda a la regiun Malögia, cun las vischnancas da Bregaglia fin S-chanf, da surpigliar il deficit.
Betg cuntent cun il deficit – però cun las autras cifras
Il campiunadi mundial da freestyle 2025 è stà la fin da mars durant duas emnas cun occurrenzas da snowboard e skis ed ha tenor la societad d’organisaziun purtà hotels plains en tut l’Engiadin’Ota. Era plaschaivel sajan ils bundant 300 milliuns aspectaturs ed aspectaturas sin l'entir mund che han guardà las cursas ed occurrenzas en la televisiun, quai tenor cifras da la FIS.
Però haja l'organisaziun era gì da prender en maun dapli daners che pensà. Quai pervi da las pernottaziuns supplementaras ch'ils 1'800 atlets ed atletas han chaschunà. L'organisaziun aveva fatg quint be cun 800 persunas. Ma era la situaziun da la naiv n'è betg stada ideala. L'emprim hajan ins pervi da la mancanza da naiv stuì far supplementara. E curt avant il campiunadi mundial haja quai lura dà ina navada, e quella haja gì num rumir davent. Era quellas sfidas hajan chaschunà dapli custs per l’organisaziun, uschia il president Sigi Asprion.
Uss duai vegnir fatg in rendaquint provisoric
La societad campiunadi mundial da freestyle 2025 ha uss mo da purtar ensemen las ultimas facturas, ed era da spetgar sin las contribuziuns dal chantun e da la Confederaziun. Pir lura saja pussaivel da far il rendaquint cun il deficit pli precis, e dar novas infurmaziuns.